Bréfið sem Jóhanna sendi Davíð

„Ljóst er að traust manna á fjármálakerfi Íslendinga hefur beðið gífurlegan hnekki. Á það jafn við um fjármálafyrirtækin sem starfað hafa á markaðnum og opinbera aðila, ráðuneyti og stofnanir sem hlutverk hafa haft við stjórnun og eftirlit með fjármálakerfinu og er Seðlabanki Íslands þar ekki undanskilinn. Umtalsverðir þjóðhagslegir hagsmunir eru fólgnir i´því að það takist að endurvekja traust á fjármálakerfinu og ber ríkisstjórninni skylda til að skoða allar mögulegar leiðir í því sambandi." Þannig hljómar upphaf á bréfi sem Jóhanna Sigurðardóttir forsætisráðherra sendi Davíð Oddssyni, formanni bankastjórnar Seðlabankans.

Eins og greint hefur verið frá kynnti Jóhanna nýtt frumvarp um Seðlabanka Íslands í ríkisstjórn í morgun. Frumvarpið fer svo fyrir þingflokkana og verður að því loknu lagt fram á Alþingi. Fer Jóhanna því fram á það við bankastjórana þrjá að hægt verði að semja við þá um starfslok. „Með hliðsjón af þvi og þeim markmiðum sem liggja að baki frumvarpinu og lýst hefur verið vill ríkisstjórnin kanna hvort vilji sé til þess af yðar hálfu að biðjast lausnar frá embætti nú þegar og leggjast þannig á sveif með stjórnvöldum í viðleitni þeirra til að endurvekja trúverðugleika og traust á Seðlabanka Íslands," segir Jóhanna í bréfinu.

Ekki er vitað hvort bankastjórarnir muni víkja úr bankanum eins og Jóhanna biður um.



Lesa má bréfið með því að hægrismella með músarbendlinum á myndina. Þá opnast gluggi þar sem hægt er að velja "open link in new window". Smellið á þann valmöguleika og þá opnast bréfið.