Orkuveitan fær lán á nýjan leik

Evrópski þróunarbankinn hefur ákveðið að opna á ný fyrir viðskipti við Orkuveitu Reykjavíkur, en þau lokuðust við hrun íslenska fjármálakerfisins síðastliðið haust. Með því opnast á ný lánalína til virkjunarframkvæmda Orkuveitunnar á Hellisheiði. „Þetta er til marks um það traust, sem bankinn ber til verkefna Orkuveitu Reykjavíkur," segir Guðlaugur G. Sverrisson, stjórnarformaður Orkuveitunnar í tilkynningu.

„Íslensk fyrirtæki hafa mátt búa við það frá því í byrjun október, að erlendar fjármálastofnanir hafa að miklu eða öllu leyti lokað á viðskipti við íslensk fyrirtæki. Fjármögnun nýframkvæmda Orkuveitu Reykjavíkur komst í uppnám af þessum sökum, jafnvel þótt ljóst væri að tekjur fyrirtækisins í erlendri mynt tryggðu að það hefði alla burði til að standa við skuldbindingar sínar."

Frá bankahruninu hefur Orkuveita Reykjavíkur unnið náið með erlendum fjármálastofnunum. Stjórn Evrópska þróunarbankans ákvað á fundi sínum föstudaginn 30. janúar að opna á ný fyrir lánalínu, sem bankinn samdi um við Orkuveitu Reykjavíkur vegna framkvæmda við Hellisheiðarvirkjun. Greiðslan nú nemur 6,4 milljörðum króna og er vegna þriðja áfanga virkjunarinnar sem tekinn var í notkun síðastliðið haust.

„Í fjárhagsáætlun Orkuveitu Reykjavíkur fyrir yfirstandandi ár er gert ráð fyrir seinkun ýmissa framkvæmda, áframhaldandi hagræðingu og sparnaði á mörgum sviðum. Afgreiðsla stjórnar CEB var ein af forsendum áætlunarinnar og verður því áfram unnið samkvæmt þeirri áætlun sem stjórn Orkuveitu Reykjavíkur samþykkti undir lok síðasta árs," segir í tilkynningunni.