Undirbúa stjórnarskrárbreytingar

Jóhanna Sigurðardóttir, forsætisráðherra, hefur sett á fót ráðgjafarhóp ríkisstjórnarinnar til að vinna tillögur um breytingar á stjórnarskránni. Björg Thorarensen, prófessor í stjórnskipunarrétti og forseti lagadeildar Háskóla Íslands, mun leiða ráðgjafarhópinn, sem undirbúa mun frumvarp til stjórnarskipunarlaga sem lagt verðu fram á Alþingi á næstu vikum.

Mun Björg koma tímabundið til starfa í forsætisráðuneytinu á meðan á þessu verkefni stendur. Aðrir í hópnum eru þau Bryndís Hlöðversdóttir, forseti lagadeildar Háskólans á Bifröst, og Gísli Tryggvason, talsmaður neytenda. Í erindisbréfi til ráðgjafarhópsins er vísað í stefnuyfirlýsingu ríkisstjórnarinnar og henni falið að gera tillögu um stjórnarskrárákvæði um eftirtalið auðlindir í þjóðareign, þjóðaratkvæðagreiðslur og aðferð við breytingar á stjórnarskrá með sérstakri þjóðaratkvæðagreiðslu.

Í fréttatilkynningu frá forsætisráðuneytinu kemur fram að þess sé jafnframt óskað að ráðgjafarhópurinn meti í ljósi starfs stjórnarskrárnefndar á árunum 2005-2007, og þess víðtæka samráðs sem þá átti sér stað, hvort rétt sé að gera tillögu um fleiri stjórnarskrárbreytingar á þessu stigi, einkum varðandi umhverfisvernd.

Þá verði ráðgjafarhópnum jafnframt falið að hefja undirbúning lagasetningar varðandi stjórnlagaþing eftir komandi alþingiskosningar og móta tillögur um nauðsynlega lagasetningu og eftir atvikum setningu bráðabirgðaákvæðis í stjórnarskrá. Forsætisráðherra mun að fengnum tillögum framangreindra sérfræðinga hafa samráð við alla flokka, sem fulltrúa eiga á Alþingi, áður en frumvarp til stjórnarskipunarlaga verður lagt fram á Alþingi.