Afstaða Davíðs olli Jóhönnu vonbrigðum

Brýnt er að frumvarp það sem ríkisstjórnin hefur lagt fram á Alþingi um endurskipulagningu á stjórnskipulagi Seðlabanka Íslands fái eins skjóta afgreiðslu og unnt er, segir Jóhanna Sigurðardóttir forsætisráðherra í yfirlýsingu sem hún hefur sent frá sér vegna bréfs sem hún fékk frá Davíð Oddssyni seðlabankastjóra í dag. Í bréfi sínu til forsætisráðherra sagðist Davíð ekki ætla að víkja sæti úr bankastjórn Seðlabankans eins og hún hafði farið fram á.

Í yfirlýsingunni lýsir forsætisráðherra miklum vonbrigðum með þá afstöðu sem bankastjórinn hefur ákveðið að taka í þessu máli. „Greinilegt er að bankastjórinn er ósammála því mati ríkisstjórnarinnar að mannabreytingar í Seðlabankanum nú, séu til þess fallnar að auka traust og trúverðugleika bankans. Það er hans afstaða og verður hann að taka ábyrgð á henni," segir Jóhanna.

Hún segist að öðru leyti ekki bregðast við einstökum atriðum sem fram koma í bréfi bankastjórans. Hún hyggist vinna áfram að framgangi þess mikilvæga verkefnis að skapa frið um helstu stofnanir samfélagsins, ekki síst í þeim tilgangi að endurreisa að fullu traust á fjármálakerfinu. Sé frumvarp um endurskipulagningu á stjórnskipulagi Seðlabanka Íslands mikilvægt í því sambandi.