Átján Vítisenglum hefur verið vísað frá

Allt er til reiðu í nýju klúbbhúsi Fáfnis í Hafnarfirði fyrir veislu sem þar verður í kvöld. Lítið fer fyrir erlendum gestum sem boðað höfðu komu sína þar sem átján vítisenglar hafa verið stöðvaðir við komuna til landsins.

Það verður væntanlega glatt á hjalla við Gjáhellu í Hafnarfirði í kvöld. Veisla verður haldin til að vígja glænýtt klúbbhús Fáfnismanna og bjóða þeir upp á íslenska kjötsúpu af því tilefni. Þungarokkshljómsveitin Dark Harvest leikur svo fyrir dansi.

Á annan tug Hells Angels manna voru væntanlegir í veisluna. Átján þeirra flugu til íslands en komust ekki í gegn um landamæraeftirlit á Leifsstöð sem var sérstaklega hert vegna komu þeirra.

Veislan verður engu að síður haldin og hefur meðlimum úr íslenskum mótorhjólaklúbbum verið boðið. Lögreglan ætlar að fylgjast með framvindu mála en mun ekki aðhafast nema eitthvað róstur verði eins og einn lögreglumaðurinn orðaði það við fréttastofu í dag.