Bankahrun hjá EVE Online

„Það er hægt að læra margar lexíur í EVE sem kosta ekki mikið,“ segir Hilmar Veigar Pétursson, framkvæmdastjóri CCP. Heimasíða New York Times birti grein um banka sem fór á hausinn í íslenska tölvuleiknum EVE Online eftir að bankastjórinn Ricdic stakk af með hluta af innistæðunni og seldi á svörtum markaði fyrir alvöru peninga. Eftir sitja innistæðueigendurnir með sárt ennið.

Hilmar Veigar segir að erfitt sé að líkja þessu við íslenska bankahrunið enda sé EVE Online einungis tölvuleikur.

„Bankahrunið er náttúrulega alvörumál eins og við þekkjum kannski manna best en þetta er náttúrulega partur af því sem mönnum er leyft að gera í leiknum. Þeir brutu engar reglur með þessu,“ segir Hilmar. „Það hafa svona bankar komið og farið í EVE oft áður og við á engan hátt bökkum þessa banka upp. Þeir keyra sig áfram á því trausti sem þeir mynda sér. Í þessu tilfelli var einhver þarna sem braut traustið og þar af leiðandi hrynur bankinn. Það er áhættan sem menn tóku þegar menn fjárfestu í bankanum eða lögðu peninga í hann.“

Hilmar tekur fram að stjórnendur EVE séu hvorki með né á móti því sem gerðist, enda hafi þeir ekki yfir fjármálaeftirliti að ráða. „Þetta er í rauninni gott dæmi um hvað traust er mikilvægt í viðskiptum. Með því að leyfa þessum bönkum að húrra þá undirstrikum við að fólk þarf að treysta hvert öðru þegar það stundar viðskipti.“ Spurður hvort spilarar séu ekki óánægðir með að missa peninginn sinn segir Hilmar að það fari eftir því hversu mikið þeir áttu inni á reikningum. „Ég vona að fólk hafi sýnt einhverja aðgát í fjárfestingum og sé ekki með öll eggin í einni körfu.“