Mótmælin auka ekki ferðamannastraum til Íslands

Gísli Marteinn Baldursson borgarfulltrúi Sjálfstæðisflokksins bendir á að á síðustu sex árum hafa fjórir formenn stjórnmálaflokka á Íslandi greinst með krabbamein. Það eru þau Halldór Ásgrímsson, Davíð Oddsson, Ingibjörg Sólrún Gísladóttir og Geir H. Haarde. Þetta kemur fram á bloggsíða Gísla sem segir þetta ótrúlega háa hlutfall segja sína sögu um álagið sem þetta fólk er undir.

„Ég veit það af kynnum mínum við þau að þau eiga það sameiginlegt að taka starfið inn á sig. Það sem keyrir þau áfram er áhuginn á að gera þjóðfélagið betra og það getur verið erfitt að stimpla sig útúr slíku starfi. Öll hafa þau líka tekist á við veikindi sín af æðruleysi, og leyfist mér að segja karlmennsku," skrifar Gísla á síðu sína.

Hann segist síðan halda að þeim líði ekki vel sem köstuðu sér á bíl Geirs á dögunum og hafa sent honum og Ingibjörgu Sólrúnu bölbænir að undanförnu. „Með því á ég auðvitað ekki við friðsama mótmælendur sem flestir hverjir hafa verið til sóma, heldur hina sem hafa skemmt fyrir sjálfum sér, öðrum mótmælendum og þjóðinni allri því myndir af ofbeldinu hafa birst flestum í fjölmiðlum hér í Bretlandi og þær munu svo sannarlega ekki auka ferðamannastraum til landsins."

Hann segir síðan að allir hljóti að senda Geir H. Haarde og fjölskyldu hans bestu óskir um góðan bata. „Hlýjar hugsanir og góðir straumar hljóta að berast frá þjóðinni til hans í dag. Sama gildir um Ingibjörgu Sólrúnu sem nú er að koma til landsins, vonandi á batavegi. Megi þau bæði ná fyrri styrk og mæta öflug til leiks á ný."