Skelfileg staða stjórnarflokkanna

Gylfi Arnbjörnsson forseti ASÍ segir aðstæðurnar sem komnar eru upp í íslenskri pólitík skefilegar. Hann skilur niðurstöðu Geirs Haarde og telur brýnt að Alþingi reyni að draga úr aðgerðum sem þrengja að heimilinum í landinu. Hann vill að menn taki afstöðu til aðildar að ESB fyrir kosningar svo ekki þurfi að kjósa aftur til þess að breyta stjórnarskránni.

„Í fyrsta lagi er það mikið áhyggjuefni að forsætisráðherra skuli eiga við svo alvarleg veikindi að stríða. Það eitt og sér er mikið áfall að heyra og aðstæðurnar sem upp eru komnar eru auðvitað skelfilegar, það er að segja að báðir oddvitar stjórnarflokkanna standi í svo alvarlegum veikindum," segir Gylfi sem skilur þó niðurstöðu Geirs mæta vel.

„Hann metur þetta þannig að veikindin séu það alvarleg að hann geti ekki gefið kost á sér áfram og ég tel rökrétt hjá honum að fresta landsfundi. Það virðist einnig vera komin samstaða á milli stjórnarflokkanna um að fara í kosningar í vor."

Gylfi segir mikilvægt að ákvarðanir verði teknar á Alþingi sem dragi úr þrengingum að heimilunum í landinu. Hann segir einnig ljóst að afstaðan til ESB og hugsanleg aðildarumsókn sé það verkefni sem menn verði að leysa á þessu þingi svo ekki þurfi að fara aftur í kosningar vegna breytinga á stjórnarskrá á því næsta.