ASÍ gefst upp á ríkisstjórninni

Formenn aðildarfélaga ASÍ taka í dag afstöðu til tillögu atvinnurekenda um að fresta framlengingu kjarasamninga fram í júní. Upphaflega var stefnt að nokkurs konar þjóðarsátt með aðkomu ASÍ, SA, hins opinbera og ríkisstjórnarinnar en nú er lagt til að endurskoðun verði frestað og hefur miðstjórn ASÍ hvatt ríkisstjórnina til að boða til kosninga í vor. „Söguleg tíðindi," segir Kristján Gunnarsson, formaður Starfsgreinasambandsins, SGS.

Samkvæmt kjarasamningum sem átti að endurskoða um miðjan febrúar er launahækkun 1. mars og svo aftur 1. janúar 2010. Atvinnurekendur vilja fresta þessum dagsetningum þannig að launahækkanir komi seinna og kostnaðarlækkun framkallist hjá atvinnulífinu. Kristján segir varnarviðbrögð að fresta samningum frekar en að slá þá af.

„Atvinnurekendur hafa óskað eftir viðræðum um meiri sveigjanleika með tímasetningar til að efna ákvæði kjarasamninga en þó þannig að á samningstímanum reyni þeir að standa við innihaldið. Þetta gera þeir vegna þess að fyrirtækin eru illa stödd. Við höfum sagt að þetta komi til álita," segir Gylfi Arnbjörnsson, forseti ASÍ.

Gylfi bendir á að atvinnurekendur geti líka sagt samningunum upp. „Við erum að reyna að búa okkur til tíma til að vinna úr þessum erfiðu aðstæðum," segir hann.

Forystumenn á vinnumarkaði tilkynntu ríkisstjórninni í nóvember að hún þyrfti að treysta ímynd sína og endurnýja umboð sitt með uppstokkun. Hún væri rúin trausti. Gylfi segir að ríkisstjórnin hafi ekki viljað neina uppstokkun og því sé komið að endalokum þess sem hún geti staðið að. Verkalýðshreyfingin treysti sér ekki til að ræða við ríkisstjórnina við núverandi aðstæður.

„Við erum að ræða við ASÍ um mögulega frestun samninganna en Samtök atvinnulífsins hafa hingað til ekki tekið afstöðu með eða á móti ríkisstjórninni. Við höfum alltaf unnið með ríkisstjórninni," segir Þór Sigfússon, formaður SA.

„Að mínu viti hefur margt gengið vel og margt gengið illa líka. Ég hefði viljað sjá menn bretta meira upp ermar núna, það eru vonbrigði mín, en það þýðir ekki að ég hefði viljað sjá skipt um ríkisstjórn," segir hann. ghs@frettabladid.is