Skulda þrefaldar árstekjur

Heildarskuldir sjávarútvegs í ríkisbönkunum eru um 427 milljarðar króna. Þetta kemur fram í svari fjármálaráðherra við fyrirspurn Kristins H. Gunnarssonar. Mestar eru skuldirnar í Nýja Landsbankanum, eða 1.300 milljónir evra. Það eru tæpir 168 milljarðar króna. Skuldir greinarinnar í Nýja Glitni eru 125 milljarðar króna og í Nýja Kaupþingi 85,5 milljarðar.

„Það er ekki ástæða til að hafa áhyggjur ef þetta eru heildarskuldir greinarinnar, þetta eru um það bil þrefaldar árstekjur. Það er nokkuð víst að greinin ræður við það, ef þessu er dreift á nokkur ár, sem það örugglega er," segir Kristinn.

Hann segist hins vegar hafa ástæðu til að ætla að ekki séu allar skuldir inni í þessari tölu. „Það vantar skuldir í öðrum fjármálastofnunum inn í þessa tölu. Þá gætu ýmis kvótakaup verið færð undir fjármálafyrirtæki. Oft eru það einkahlutafélög sem hafa umsýslu með því." Kristinn segir veðmál hins vegar áhyggjuefni. „Þegar verð hefur lækkað um 50 prósent þá er nokkuð víst að við erum að ræða um áhættulán."

Svör við því hve mikið af lánunum væri vegna kvótakaupa og hvaða tryggingar hefðu verið gefnar fengust ekki. Kristinn segir það einnig áhyggjuefni.- kóp