Karlar enn með yfirhöndina

Karlar voru við stjórnvölinn í mun ríkara mæli en konur í íslensku samfélagi á síðasta ári. Þetta kemur fram í Hagtíðindum Hagstofunnar. Þar segir að hlutur kvenna fari þó vaxandi í ýmsum áhrifastöðum en standi í stað eða minnki í öðrum. Konur eru um þriðjungur þingmanna, ráðherra, sveitarstjórnarmanna, ráðuneytisstjóra, skrifstofustjóra ráðuneyta, héraðsdómara og nefndarmanna í opinberum nefndum. Þær eru um fjórðungur forstöðumanna ríkisstofnana, framkvæmdastjóra sveitarfélaga og stjórnarmanna stærstu lífeyrissjóðanna, samkvæmt upplýsingum frá Hagstofunni.

Þá eru konur meirihluti stjórnenda á leikskóla- og grunnskólastigi en karlar meirihluti stjórnenda á framhaldsskóla- og háskólastigi. Kynjaskipting meðal stjórnarformanna og stjórnarmanna fyrirtækja var óbreytt árin 1999-2007, en konur voru þar rúmur fimmtungur. Hlutfall kvenna af framkvæmdastjórum hækkaði úr 15% í 19% á sama tíma. Dagblöðum er nú sem fyrr ritstýrt af körlum en konur hafa komið að ritstjórn og fréttastjórn dagblaða síðustu árin.