Formenn flokkanna hittist og fari yfir stöðuna

Guðjón Arnar Kristjánsson formaður Frjálslynda flokksins segir tíðindi dagsins setja málin í þjóðfélaginu í enn meiri hnút. Hann vill að forystumenn stjórnmálaflokkanna hittist sem fyrst og fari yfir stöðu mála.

„Það kemur mér auðvitað mjög á óvart að heilsufar forsætisráðherra skuli vera með þessum hætti og ég óska honum góðs bata og velfarnaðar," segir Guðjón Arnar sem er á því að forystumenn flokkanna hittist og ræði málin.

„Hvenær svosem það hentar honum eða Ingibjörgu veit ég ekki. En í þessari stöðu tel ég rétt að menn hittist og ræði framhaldið. Líkt og ég gat um í ræðu minni í þinginu í gær þá eru þessir mánuðir sem framundan eru gríðarlega mikilvægir."

Guðjón segist ekkert hafa við þá tímasetningu sem Geir nefndi með kosningar að athuga en Geir vildi að gengið yrði til kosninga þann 9.maí.

„En ég hef mikinn áhuga á að fá eitthvað úr þessari áfangaskýrslu frá sannleiksnefndinni áður en gengið er til kosninga. Það voru nú allir flokkarnir sem komu þessari nefnd á laggirnar og ég tel rétt að við fáum eitthvað frá henni áður en það er kosið."