Geir situr í embættum sínum fram á vor

Geir Haarde forsætisráðherra mun sitja áfram sem formaður Sjálfstæðisflokksins fram að landsfundi og verður jafnframt forsætisráðherra fram á vor að öllu óbreyttu. Þetta sagði Árni Mathiesen fjármálaráðherra í samtali við fréttamenn Stöðvar 2 og Vísis í Valhöll í dag.

Geir greindi frá því á fundi með fréttamönnum í hádeginu í dag að hann hefði greinst með illkynja æxli í vélinda. Hann þyrfti að leita sér læknismeðferðar erlendis í næsta mánuði. Vegna óvissunar sem þessu fylgdi myndi hann ekki gefa kost á sér sem formaður Sjálfstæðisflokksins á næsta landsfundi, sem fram fer í lok mars.

Þá greindi Geir frá því að þingflokkur og miðstjórn Sjálfstæðisflokksins vildu að kosið yrði til Alþingis þann 9. maí næstkomandi.