Steingrími best treyst

Steingrímur J. Sigfússon, formaður Vinstrihreyfingarinnar - græns framboðs, nýtur mest trausts landsmanna af öllum formönnum stjórnarflokkanna, ef marka má nýja skoðanakönnun MMR. Flestir, eða 33,7%, segjast bera mikið traust til Steingríms J. Sigfússonar, formanns Vinstrihreyfingarinnar - græns framboðs. Þar á eftir kemur Sigmundur Davíð Gunnlaugsson, nýkjörinn formaður Framsóknarflokksins, en 23,2% segjast segist bera mikið traust til Sigmundar sem er réttum tveim prósentustigum færri en segjast bera lítið traust til hans. 21,5% bera mikið traust til Geirs Haarde, formanns Sjálfstæðisflokksins, 19,1% bera mikið traust til Ingibjargar Sólrúnar Gísladóttur, formanns Samfylkingarinnar og 7,1% segjast bera mikið traust til Guðjóns Arnars Kristjánssonar, formanns Frjálslynda flokksins.

Nokkrar breytingar mælast á trausti svarenda til formanna stjórnmálaflokkanna milli kannana. Af þeim formönnum sem mældir voru í desember síðastliðnum er Steingrímur J. sá eini sem fleiri segjast bera mikið traust til núna en þegar síðast var mælt (aukning um slétt prósentustig). Aðrir formenn hafa ýmist látið af embætti eða lækkað mikið. Geir H. Haarde, forsætisráðherra og formaður Sjálfstæðisflokksins, nýtur nú mikils trausts meðal 21,5% svarenda en naut mikils trausts meðal 31,4% í byrjun desember. Ingibjörg Sólrún Gísladóttir nýtur nú mikils trausts meðal 19,1% svarenda en naut mikils trausts meðal 31% í byrjun desember. Fjöldi þeirra sem kveðst bera lítið traust til formanna ríkisstjórnarflokkanna hefur aukist nokkuð: Í tilfelli Geirs úr 49,5% í 63,6% og í tilfelli Ingibjargar Sólrúnar úr 42,2% í 57,8%.

Séu niðurstöður greindar eftir stuðningi svarenda við stjórnmálaflokka kemur í ljós að Geir H. Haarde, forsætisráðherra og formaður Sjálfstæðisflokksins, nýtur mests stuðnings meðal eigin flokksmanna - en 85,1% þeirra sem segjast myndu styðja Sjálfstæðisflokkinn segjast bera mikið traust til formannsins. Þar á eftir kemur Steingrímur J. Sigfússon, formaður Vinstri grænna, en 82,9% stuðningsmanna Vinstri grænna segjast bera mikið traust til hans. 78% Framsóknarfólks kveðst bera mikið traust til formanns síns, Sigmundar Daviðs Gunnlaugssonar, 64,7% stuðningsmanna Samfylkingarinnar segjast bera traust til formanns síns, Ingibjargar Sólrúnar Gísladóttur og 64,7% Frjálslyndra segjast bera mikið traust til formanns síns, Guðjóns Arnars Kristjánssonar.

Steingrímur J. Sigfússon er aftur á móti sá formaður stjórnmálaflokkanna sem nýtur mests traust meðal stuðningsmanna annarra flokka, að Sjálfstæðisflokknum undanskildum. Steingrímur nýtur mikils trausts meðal 36,8% Samfylkingarfólks, 27,9% Framsóknarmanna og 26,5% Frjálslyndra. Sjálfstæðismenn virðast aftur móti bera mest traust Ingibjargar Sólrúnar Gísladóttur, af formönnum annarra flokka, en 28,5% Sjálfstæðismanna segjast bera mikið traust til hennar.