Hugnast þjóðaratkvæðagreiðsla

Álfheiður Ingadóttir, þingmaður VG og formaður viðskiptanefndar Alþingis, segir að sér hugnist að fram fari þjóðaratkvæðagreiðsla um Icesave-samkomulagið sem nýverið var undirritað. Hún styðji þó samkomulagið og muni ekki beita sér fyrir sérstakri þjóðaratkvæðagreiðlu um málið.

Birgitta Jónsdóttir, þingflokksformaður Borgarahreyfingarinnar, telur eðlilegt að almenningur fái að kjósa um málið í sérstakari kosningu.

Álfheiður segist alltaf hafa verið stuðningsmaður þess að sett verði lög um þjóðaratkvæðagreiðslur og að kosið væri um stærstu mál. Spurð hvort það eigi við um þetta tiltekna mál segir hún: „Ég hefði ekkert á móti því."

„Ég lít svo á að kosningarnar í vor hafi verið tiltekin þjóðaratkvæðagreiðsla og í kosningunum hafi verið gert upp á ákveðinn hátt við bankahrunið og afleiðingar þess," segir þingmaðurinn.

Þá segir Álfheiður að vinstriflokkunum hafi verið falið með sögulegum hætti að endurreisa landið og til þess hafi þeir fengið skýrt umboð. „Það mátti öllum vera ljóst á störfum minnihlutastjórnarinnar frá 1. febrúar að það væri eitt mikilvægasta verkefni íslenskra stjórnvalda að ná lendingu í þessu Icesave-máli."

Álfheiður styður samkomulagið sem undirritað var í fyrrinótt. „Ég ef ekki séð aðra leið betri en það gerir það enginn með gleði. Þetta er engin óskastaða."