Enginn togari á veiðum

Enginn íslenskur togari er á veiðum í dag, sjómannadag. Fjölbreytt dagskrá er víða um land í tilefni dagsins.

Um 2000 skip tilheyra íslenska skipaflotanum og liggja þau bundin við bryggju í dag. Öll fiskiskip skulu samkvæmt lögum liggja í höfn um sjómannadag. Skipin þurftu að koma til hafnar fyrir hádegi í gær og mega ekki sigla aftur út fyrr en eftir hádegi á morgun. Hjá Tilkynningarskyldunni fengust þær upplýsingar að ekkert íslenskt skip er að veiðum í dag.

Sjómannadansleikir voru um allt land í gær og fóru þeir að mestu leyti vel fram. Sjómannadagurinn hefur á síðustu árum verið að færa sig meira í átt að fjölskylduhátíð og því margt í boði fyrir þá sem vilja halda daginn hátíðlegan.

Í Reykjavík hófust hátíðarhöldin í raun og veru í gær en skemmtidagskrá er í allan dag á Grandagarðinum. Þar má skoða hina ýmsu fiska, hlusta á sjómannasöngva og fara í siglingu svo eitthvað sé nefnt.

Sérstök hátíðardagskrá er í Sjóminjasafninu á Grandagarði klukkan tvö. Þar flytur Jón Bjarnason, sjávarútvegsráðherra, ávarp ásamt fulltrúum sjómanna og útvegsmanna.