Vilja ekki einkavæða Gagnaveituna

Hallveig, félag ungra jafnaðarmanna í Reykjavík, lýsir furðu sinni yfir því að aftur séu að skjóta upp kollinum hugmyndir um einkavæðingu Gagnaveitu Reykjavíkur. Hallveig ítrekar þá skoðun sína að Gagnaveituna eigi ekki að einkavæða.

Gagnaveitan rekur veitukerfi og er því á einokunarmarkaði, að fram kemur í tilkynningu félagsins. Opinberir aðilar verði að sjá um uppbyggingu og rekstur á veitukerfum. Það sé ekki hagur neytenda að fjárfest sé í dýrri uppsetningu á mörgum veitukerfum til að koma á samkeppni.

„Það er alveg jafn lítið vit í margföldum vatnslögnum og margföldum ljósleiðurum. Það er mjög mikilvægt að landsmenn hafi jafnan aðgang að háhraða nettengingu og eiga landsmenn ekki að vera háðir einkaaðilum til að hafa aðgang að svo sjálfsögðum hlut."