Lið ársins í enska boltanum

Strákarnir á goal.com hafa ekki bara tekið saman vonbrigðalið tímabilsins í enska boltanum því þeir hafa einnig val lið ársins.

Liðsuppstillingin að þessu sinni er 4-4-2.

Markvörður: Joe Hart, Birmingham.

Kom í láni frá Man. City eftir að félagið keypti Shay Given. Hart hefur staðið sig frábærlega hjá Birmingham eins og tölfræðin sýnir meðal annars. Í 18 leikjum hefur hann fimm sinnum haldið hreinu og aðeins fengið á sig 18 mörk. Hann er þess utan ekki einu sinni í góðu liði.

Hægri bakvörður: Stephen Carr, Birmingham.

Það eru allir sammála því að Birmingham er að leika talsvert fyrir ofan getu. Árangur liðsins í vetur má þó að mestu þakka frábærum varnarleik og markvörslu. Þar hefur fyrirliðinn Carr farið mikinn.

Miðvörður: Richard Dunne, Aston Villa.

Enn einn leikmaðurinn sem Man. City gat ekki notað og blómstrar annars staðar. Dunne hefur farið á kostum í vörn Villa og þess utan skorað tvö mikilvæg mörk. City hlýtur að naga sig í handarbökin yfir því að hafa látið hann fara.

Miðvörður: John Terry, Chelsea

HM-tímabil dregur greinilega fram það besta hjá fyrirliða Chelsea, í það minnsta inn á vellinum því hann hefur ekki alveg gert eins gott mót utan vallar. Chelsea-vörnin er sú besta í deildinni og ef ekki væri fyrir afglöp Cech í markinu fengi Chelsea varla á sig mark.

Vinstri bakvörður: Patrice Evra, Man. Utd.

Mesta keppnin um sæti í liðinu er þessi staða. Ashley Cole gæti hæglega verið hér líka. Frakkinn var ekki alveg upp á sitt besta í fyrra en hann hefur verið í toppformi og haldið miklum stöðugleika í allan vetur. Eins og rennilás upp og niður vænginn. Hefur ekki veitt af þar sem flestir varnarmenn United hafa verið meiddir í vetur.

Hægri kantur: Aaron Lennon, Tottenham.

Menn eru hættir að tala um Lennon sem leikmann sem á eftir að blómstra. Hann er að blómstra í vetur og hefur lagt upp 8 mörk í 17 leikjum. Þess utan skorað 3 mörk og er sífellt ógnandi. Er kominn í landsliðið og ef hann heldur svona áfram verður hann frábær á HM næsta sumar.

Miðjumaður: Darren Fletcher, Man. Utd

Fyrir ekki löngu síðan var Fletcher aðhlátursefni margra sem skildu ekki hvað hann væri að gera hjá United. Þeir sem hlógu eru í dag í felum inn í skáp enda er Fletcher orðinn miðjumaður númer eitt hjá United. Þekktur fyrir að blómstra í stóru leikjunum. Sérfræðingur í að brjóta niður sóknir andstæðinganna og verður sífellt betri í að sækja fram og skora. Kominn með þrjú mörk í vetur. Verið það góður að hann slær Michael Essien út í baráttunni um þessa stöðu.

Miðjumaður: Cesc Fabregas, Arsenal.

Ef við værum að kjósa leikmann ársins það sem af er þá væri Fabregas langefstur á því blaði. Hann er stoðsendingakóngur deildarinnar eins og svo oft áður. Kominn með 12 stoðsendingar í 16 leikjum og svo má ekki gleyma því að hann hefur líka skorað 7 mörk, sum hver stórglæsileg. Er þess utan fyrirliði Arsenal-liðs sem hefur blómstrað og jafnvel leikið yfir getu að margra mati.

Vinstri kantur: Craig Bellamy, Man. City

Bellamy var ekki sáttur við að vera settur út á vænginn í upphafi tímabils en hann hafði trú á Hughes og vildi sýna honum tryggð. Þess vegna fór hann á kantinn og af allt sem hann átti. Þar hefur hann líka blómstrað og verið besti maður City í vetur. Hinn mikli kraftur hans er ómetanlegur fyrir liðið og verður áhugavert að sjá hvernig Mancini tekst að nýta hinu miklu krafta Walesverjans.

Framherji: Jermain Defoe, Tottenham.

Skorað reglulega fyrir Spurs í vetur og meðal annars fimm mörk í einum og sama leiknum. Hann skorar sín mörk þess utan með stæl.

Framherji: Didier Drogba, Chelsea.

Búinn að skora 13 mörk í 15 leikjum og þess utan gefið 8 stoðsendingar. Lygileg frammistaða. Hefur einnig náð vel saman við fýlupúkann Nicolas Anelka en Drogba er samt aðalmaðurinn hjá Chelsea. Hans verður sárt saknað er hann fer til Afríku.