Norrænir sérsveitamenn æfðu sig á Íslandi

Sérsveit ríkislögreglustjóra stóð fyrir námskeiði í síðustu viku með þátttöku sérsveita frá Noregi, Danmörku og Finnlandi. Í tilkynningu frá lögreglu segir að ýmis atriði varðandi klifur og sig hafi verið æfð og fóru æfingar að mestu fram í klettabeltum Esjunnar og á Suðurnesjum.

„Meðan á æfingum stóð höfðu sérsveitarmennirnir aðstöðu á öryggissvæði Varnarmálastofnunar á Miðnesheiði, en þar er aðstaða mjög góð og allur aðbúnaður eins og best verður á kosið," segir einnig.

Þá segir að samstarf sérsveita Norðurlandanna eigi sér áralanga sögu og er mikilvægur þáttur í starfsemi sérsveitanna. „Auk þess að æfa saman gefst mönnum kostur á að bera saman bækur sínar um aðferðir við úrlausn verkefna, búnað sérsveitanna svo dæmi séu tekin," segir að lokum.