Þjóðhagslega hagkvæmt að bólusetja fyrir hlaupabólu

Ný rannsókn sem unnin var við hagfræðideild Háskóla Ísland sýnir að upptaka skipulagðrar bólusetningar gegn hlaupabólu á Íslandi væri þjóðhagslega hagkvæm. Þjóðhagslegur sparnaður við bólusetninguna væri 210 milljónir á ári samkvæmt rannsókninni. Í tilkynningu frá Háskólanum segir í rannsókninni hafi verið gerð kostnaðarábatagreining á upptöku bólusetningar gegn hlaupabólu út frá sjónarhorni alls samfélagsins.

„Hlaupabóla kostar íslenskt samfélag tæpar 290 milljónir á ári miðað við verðlag árið 2007," segir einnig. „Þar vegur þyngst vinnutap aðstandenda veikra barna með hlaupabólu."

„Ef tekin væri upp bólusetning gegn hlaupabólu og bólusett með einum skammti yrði árlegur kostnaður vegna hlaupabólu rúmar 78 milljónir. Mismunurinn er um 210 milljónir sem yrði þjóðhagslegur sparnaður af því að taka upp bólusetningu gegn hlaupabólu, miðað við þær forsendur sem gefnar eru í rannsókninni."