Samfylkingin auglýsir eftir framkvæmdastjóra

Framkvæmdastjórastaða Samfylkingarinnar verður auglýst laus til umsóknar á næstu dögum. Formaður framkvæmdastjórnar flokksins á síður von á að óflokksbundnir einstaklingar sæki um stöðuna.

Skúli Helgason sem starfaði síðastliðin ár sem framkvæmdastjóri Samfylkingarinnar ákvað nýverið að segja starfi sínu lausu þegar hann ákvað að gefa kost á sér í prófkjöri flokksins í Reykjavík fyrir nýafstaðnar þingkosningar Sigrún Jónsdóttir, fyrrverandi bæjarfulltrúi í Kópavogi, tók við starfinu tímabundið en hún lét af störfum skömmu eftir kosningarnar.

Margrét Björnsdóttir, formaður framkvæmdastjórnar Samfylkingarinnar, segir að staðan verði auglýst í dagblöðum og innan flokksins í lok maí eða byrjun júní. „Það er mikill áhugi á starfinu og okkur hafa borist margar fyrirspurnar. Við eigum von á að fá mikið af góðum umsóknum."

Ráðið verður í stöðuna frá og með 1. ágúst. Á meðan gegnir Þorgerður Jóhannsdóttir, skrifstofustjóri flokksins, stöðu framkvæmdastjóra.

Aðspurð hvort að viðkomandi verði að vera flokksbundinn félagi í Samfylkingunni segir Margrét kímin: „Ég geri ekki ráð fyrir að aðrir sæki um stöðuna en þeir sem eru annaðhvort flokksbundnir eða hafa hugsað sér að verða flokksbundnir."