Ungir framsóknarmenn í Kópavogi vilja slíta samstarfi

Í ljósi greinagerðar Deloitte um viðskipti Kópavogsbæjar við Frjálsa miðlun ehf. á árunum 2003 til 2008 teljum við ungir Framsóknarmenn í Kópavogi að ekki sé lengur grundvöllur né traust til að starfa með siðlausri forystu Sjálfstæðismanna í Kópavogi.

Þetta segir í tilkynningu frá Ungum framsóknarmönnum í Kópavogi. Þar segir einnig að þau augljósu hagsmunatengdu viðskipti bæjarnis við Frjálsa miðlun, þar sem verkefnum hafi verið útdeilt beint til Frjálsar miðlunar ehf. án verðkannana og þar sem hugsanlega hefur verið reynt að fela ósómann með rögnum bókhaldslyklum, sé líklega gróft brot á stjórnsýslulögum eða í það minnsta frávik frá eðlilegum viðskiptaháttum og auk þess siðlaus með öllu.

„Við teljum okkur því knúin til að hvetja fulltrúaráð Framsóknarmanna í Kópavogi og Ómar Stefánsson oddvita flokksins til að slíta meirihluta samstarfi við Sjálfstæðisflokkinn. Auk þess viljum við hvetja bæjarráð Kópavogs til að rannsaka að fullu hver hlutur embættismanna og kjörinna fulltrúa bæjarins var í þessu máli og hvort víðar leynist pottur brotinn, enda vilja ungir Framsóknarmenn í Kópavogi ekki taka þátt í siðlausu og óeðlilegu bruðli með almannafé," segir í tilkynningunni.