Minni umferð um Hvalfjarðargöng

Umferðin um Hvalfjarðargöng er í heildina minni það sem af er rekstrarári Spalar en á sama tíma í fyrra, en sveiflurnar eru umtalsverðar á köflum frá mánuði til mánaðar. Þannig var samdrátturinn 14% í mars miðað við sama mánuð 2008 en í apríl var aukningin hins vegar hátt í 4%. Í maí var örlítill samdráttur, upp á 1,45% frá sama mánuði í fyrra.

Þetta kemur fram á Skessuhorni í dag. Þar segir ennfremur að rekstrarár Spalar sé frá októberbyrjun til septemberloka. „Tölur síðustu tveggja mánaða gætu hugsanlega bent til þess að umferðin um göngin sé að jafnast aftur upp í það að verða svipuð og áður en þrengdi að og samdráttar fór að gæta í efnahagslífinu. Þetta kemur væntanlega betur í ljós með tölum um umferð komandi sumarmánaða og þá einnig um áhrif aukinna skatta á eldsneyti," segir í fréttinni.

www.skessuhorn.is