Með netþætti um Vestfirði

Janus Bragi Jakobsson, sem er að útskrifast úr heimildar­myndadeild Danska kvikmyndaskólans, hefur fengið styrk frá Menningarsjóði Vestfjarða til að búa til heimildarmyndaþætti á netinu um lífið á Vestfjörðum.

Ætlunin er að sýna einn þátt á viku frá og með ágúst næstkomandi þar sem spjallað verður við íbúana um lífið og tilveruna. Tónlistar­maðurinn Mugison ætlar að leggja til græjur og tónlist í verkefnið, auk hluta fjármagnsins. „Þetta svæði hefur haldið föstum tökum á mér síðan ég kom að heimsækja Mugison á Súðavík fyrir nokkrum árum,“ segir Janus, sem bjó í Reykjavík áður en hann fór út í nám. „Ég hugsaði með mér að þarna þyrfti maður að búa. Það er ekki bara landslagið heldur fólkið og andinn á svæðinu, sem er eitthvað svo bjartsýnn og tignarlegur.“

Útskriftarmynd hans úr kvikmyndaskólanum var sýnd á Skjaldborgarhátíðinni fyrir skömmu. Hún heitir The Gentlemen og með aðalhlutverkin fara útvarpsmaðurinn Andri Freyr Viðarsson, Haukur Þórðarson og Sindri Már Finnbogason. Fjallar hún þrjá unga menn sem rifja upp gömul afrek, grípa í gítarana sína og leggja drög að nýrri hljómsveit. Myndin verður sýnd í Danmarks Radio næsta vetur og hugsanlega einnig í Ríkissjónvarpinu.

Janus, sem flytur til Súðavíkur eftir útskriftina 14. júní, segir að námið í Danska kvikmynda­skólanum hafi verið mjög skemmtilegt. „Þetta er búið að vera mikið og strembið tímabil. Þetta eru fjögur ár þar sem maður er vakinn og sofinn í þessu alla daga. En maður fær mikla og góða athygli frá kennurunum og manni er treyst til að sjá um sig sjálfur.“

freyr@frettabladid.is