Gagnrýnir sjálfstæðismenn fyrir sögusagnir um hreinsanir

Steingrímur J. Sigfússon, fjármálaráðherra og formaður Vinstri grænna, gagnrýnir þingmenn Sjálfstæðisflokksins fyrir að hafa komið af stað sögusögnum um meintar pólitískar hreinsanir nýrrar ríkisstjórnar.

„Jóhanna Sigurðardóttir var að svara ómaklegum dylgjum Geirs H. Haarde um að þarna stæðu til pólitískar hreinsanir. Hún svaraði því heiðarlega að auðvitað hafi menn rætt um það að gæti komið til greina að þarna gæti komið til breytinga eins og annars staðar," sagði Steingrímur aðspurður um svör forsætisráðherra við fyrirspurn Geirs á Alþingi í gær um mannabreytingar í stjórnum bankanna. Steingrímur var gestur Kastsljóss í kvöld.

Formenn bankastjórna Nýja Kaupþings og Nýja Glitnis, þeir Valur Valsson hjá Glitni og Magnús Gunnarsson hjá Kaupþingi, tilkynntu í dag um afsagnir sínar. Steingrímur fór í framhaldinu fram á að þeir endurskoðuðu afstöðu sína.

Ræddi við formennina á föstudaginn

Steingrímur sagði í Kastljósi að Geir hafi ekki beint fyrirspurn sinni að réttum aðila í þinginu í gær. Eignaraðild bankanna heyri undir sig.

Steingrímur sagðist hafa rætt við formanna bankaráðanna á föstudaginn. „Þeir lýstu áhuga sínum á því að hætta. Þeir töldu að mörgu leyti heppilegt að gera það núna. Ég óskaði við þá að þeir sætu lengur."

Eiga heiður skilið

„Þeir eins og allir aðrir sem gengu í það erfiða verkefni að koma nýju bönkunum af stað eiga auðvitað heiður skilið fyrir það," sagði Steingrímur og bætti við hann hefði ekkert út þá að setja.

Steingrímur sagði óviðeigandi og ómaklegt að Sjálfstæðisflokknum að finna sér ekkert annað betur en að gera en að koma af stað draugasögum um pólitískar hreinsanir.