Marsibil skráði sig í Samfylkinguna

Marsibil Sæmundardóttir sem starfað hefur sem óháður varaborgarfulltrúi síðan í ágúst þegar hún sagði sig úr Framsóknarflokknum er gengin til liðs við Samfylkinguna. Marsibil segist ekki hafa getið skráð sig í stjórnmálaflokk fyrr en hún væri fullviss og sannfærð um að þar ætti hún heima. Hún hefur nú fundið sinn flokk.

Þetta kemur fram á bloggsíðu Marsibilar. Þar segir hún ennfremur að samstarf sitt með borgarstjórnarflokki Samfylkingarinnar hafi gengið mjög vel, en hún hefur starfað með honum síðan hún sagði skilið við framsókn.

„Ég hef fundið mikla samleið með Samfylkingarfólki í borginni, bæði hugmyndafræðilega, málefnalega og aðferðafræðilega. Mér er ljóst að það er skýr vilji Samfylkingarfólks að stunda heiðarleg og lýðræðisleg vinnubrögð í stjórnmálum. Mér finnst það ekki síður mikilvægt en málefnin og sú skoðun mín hefur fengið ágætis rökstuðning í atburðum síðustu mánaða á vettvangi landsmálanna," skrifar Marsibil.

Hún segist síðan vilja sinna störfum sínum í borginn eins vel og hún getur.

„Ég tel mig gera það best í Samfylkingunni, með því fólki, hugmyndafræði, hugsjónum og aðferðafræði sem þar er við lýði. Ég skráði mig því í Samfylkinguna í gærkvöldi og hlakka til að takast á við verkefni framtíðarinnar."