Býður milljón þeim sem tekur að sér afborganir

Fjölskyldufaðir á Akranesi hefur auglýst einbýlishús sitt til sölu og býður eina milljón í peningum þeim sem er reiðubúinn að yfirtaka skuldirnar á húsinu. Hann segir gjaldþrot blasa við ef ekki selst og er illur út í þá sem stýrðu þjóðarbúinu í þrot.

Karl Eggertsson, fjölskyldufaðir á Akranesi, greip í gær til þess ráðs að auglýsa einbýlishús til sölu í smáauglýsingum Fréttablaðsins. Húsið er 227 fermetrar og fæst gegn yfirtöku skulda og milljón á borðið - sem seljandinn vill gefa þeim sem losar hann við skuldirnar.

Karl keypti húsið fyrir tæpum fimm árum og bjó þar ásamt konu og tveimur sonum. Þau fluttu vegna atvinnumissis vestur þar sem þau hafa rekið Hótel Látrabjarg, svo aftur suður á Skaga fyrir tveimur árum og keyptu í hagsýni sinni helmingi minna hús. Nema þá gekk ekkert að selja. Nú greiða þau af tveimur húsum á Akranesi, hóteli fyrir vestan og húsi á Patró.

Karl er varla einn í þessari súpu. Í árslok 2006 skulduðu heimilin röska 1300 milljarða en tæpa 1900 milljarða nokkrum dögum fyrir bankahrunið. Engar opinberar tölur eru fyrir skuldir heimilanna í dag en miðað við gengi krónu og verðbólgu hafa skuldirnar líklega vaxið um 100 milljarða frá bankahruni. Það þýðir að skuldabyrði heimilanna hefur þyngst um nærri 670 milljarða króna á tveimur árum.

En Karl er ekki af baki dottinn þótt gjaldþrot geti verið handan við hornið. Hann kveðst heilsuhraustur og vinnufús, hann hafi miklu meiri áhyggjur af því hvað stjórnvöld séu að gera. Fari allt á versta veg í heimilisbókhaldinu myndi hann una sér í afdal.