Nauðgaði barnsmóður sinni

Fjölskipaður Hæstiréttur staðfesti í dag dóm Héraðsdóms Suðurlands yfir karlmanni sem í febrúar á þessu ári var dæmdur í í fjögurra og hálfs árs fangelsi fyrir nauðgun og hrottalega líkamsárás gagnvart barnsmóður sinni. Honum var einnig gert að greiða konunni miskabætur að upphæð 1200 þúsund krónur.

Fólkið sleit samvistum í desember 2007. Maðurinn var fundinn sekur um að hafa aðfaranótt 9. mars 2008 ráðist á konuna á heimili hennar þar sem hann hrinti henni í stofugólfið og sparkaði í hana. Maðurinn veitti barnsmóður sinni fjölda hnefahögga í höfuð og líkama, reif í hár hennar, sló höfði ítrekað í gólfið og þvingaði að lokum konuna til samræðis og endaþarmsmaka.

Að morgni sama dags réðst hann aftur á konuna og sló hana mörgum hnefahöggum, einkum í kvið, bak og höfuð, auk þess að trampa á konunni þar sem hún var í hnipri á eldhúsgófli íbúðarinnar.

Árásin var harkaleg og var tekið tillit til þess í dómnum en konan hlaut mikla áverka. Dóminn kváðu upp þau Árni Kolbeinsson, Garðar Gíslason, Gunnlaugur Claessen, Ingibjörg Benediktsdóttir og Markús Sigurbjörnsson.