Össur segir stjórnarsáttmála ekki eiga við Helguvík og Bakka

Í verkefnaskrá ríkisstjórnar Samfylkingarinnar og Vinstri grænna, í kafla um aðgerðir í þágu atvinnulífs, segir: "Engin ný áform um álver verða á dagskrá ríkisstjórnarinnar". En hefur þetta ákvæði einhverja þýðingu í raun?

"Þessi setning þýðir það eitt að það þýðir ekkert fyrir erlend álfyrirtæki að koma og banka uppá hjá iðnaðarráðherranum. Það verða engin ný áform um álver," segir Össur Skarphéðinsson í viðtali við Stöð 2.

Sjálfur er Össur nýbúinn að ganga frá nýjum fjárfestingarsamningi stjórnvalda og Norðuráls vegna álvers í Helguvík. Þar hófst uppsteypa kerskála síðastliðið haust en eftir að heimskreppan skall yfir hefur Norðurál leitað leiða til að halda áfram framkvæmdum.

Össur segir það liggja fyrir að búið sé að taka ákvarðanir varðandi Helguvík og þeim verði ekki breytt.

Þá hefur Alcoa um þriggja ára skeið undirbúið álver á Bakka við Húsavík á grundvelli viljayfirlýsinga sem í gildi eru við ríkisstjórn, sveitarfélög og orkufyrirtæki.

Spurður hvort ríkisstjórnin styðji þau áform segir Össur að ríkisstjórnin styðji ekki ný áform um álver. Áform um Bakka séu hins vegar gömul áform. Það sé í gangi ákveðið samkomulag milli ríkisstjórnarinnar, Norðurþings og Alcoa og það sé í gildi.

Spurður hvort orðin í stefnuyfirlýsingunni, "engin ný áform um álver verða á dagskrá ríkisstjórnarinnar," eigi hvorki við Helguvík né Bakka svarar Össur: "Já."