Grímuhafi stýrir kreppuverki

„Þetta er með því betra sem maður hefur lesið," segir nýkrýndur Grímuverðlaunahafi, Kristín Jóhannesdóttir, um sitt nýjasta leikrit Brennuvargar. Verkið, sem Mark Frisch skrifaði á síðustu öld, verður frumsýnt í Þjóðleikhúsinu um miðjan október.

Kristín fékk Grímuna sem leikstjóri ársins fyrir Utan gátta og bíða margir með eftirvæntingu eftir hennar næsta skrefi á leiksviðinu. Með aðalhlutverkin í Brennuvörgum, sem er kolsvört kómedía, fara Eggert Þorleifsson og Ólafía Hrönn Júlíusdóttir. Leika þau Biederman-hjónin sem fá heim til sín þrjá brennuvarga en brestur þor eða dómgreind til að hindra að þeir kveiki í allri borginni. Með hlutverk brennuvarganna fara Björn Thors og Stefán Hallur Stefánsson. Edda Arnljótsdóttir leikur síðan þjónustustúlkuna á heimilinu sem kemur mikið við sögu.

Tónlistina í verkinu semur Barði Jóhannsson.

„Það er svo sérkennilegt og skemmtilegt að verkið talar beint inn í þetta hrun okkar og á sér magnaðar hliðstæður í því ferli öllu. Í því felst skírskotun í því hvað það er í manninum sem veldur því að við göngum eins og blinduð út í eyðileggingu og glórulausa vitleysu eins og við könnumst við hér á landi," segir Kristín. „Þetta verður mjög skemmtilegt og eitthvað sem er nauðsynlegt fyrir alla Íslendinga á þessari ögurstundu sem við lifum að reyna að komast að því hvað klikkaði hjá okkur. -fb