Faðir fimm ára stúlkunnar: Við reynum að jafna okkur

Fjölskylda litlu stúlkunnar, sem varð fyrir lífshættulegri hnífsstungu í gær, er í áfalli eftir árásina. Ellefu ára systir hennar varð vitni að árásinni og reyndi að vara systur sína við. Stúlkan er á batavegi. Hún er gerð úr stáli segir faðir hennar.

Álfheiður Björk, fimm ára, og systir hennar, sem er ellefu ára, voru að horfa á teiknimynd á heimili sínu við Suðurgötu í Keflavík í gærmorgun þegar bankað var á útidyrahurðina. Foreldrarnir voru þá staddir á efri hæð hússins.

„Og við heyrum að það er bankað. Við erum ekkert að spá í þetta heyrum öskrað og hlaupum niður. Þá stendur yngri stelpan og er eitthvað að fipast í bolnum sínum. Ég hélt að þetta væri pöddu fríkát - að hún hefði fengið könguló á sig. En svo lyftir konan mín bolnum upp og þá er allt út í blóði," segir Óskar Harðarson faðir stúlknanna.

Eldri systirin sá hvað gerðist út um stofugluggann og reyndi að vara systur sína við að fara til dyra. Álfheiður litla Björk man eftir því sem gerðist.

„Hún segir bara að hafa verið bankað og hún farið til dyra. Einhver kona rekist í hana og hún hlaupið inn. Það er það eina sem hún spáir í," segir Óskar.

Aðspurður hvernig fjölskyldan hafi upplifað þetta hrikalega atvik segir Óskar að þetta hafi auðvitað verið mikið sjokk.

„Við reynum að jafna okkur hægt og rólega. Það Voðalega gott fólk hérna."

Fjölskyldan talaði við prest og segir Óskar að það hafi hjálpað mikið.

„Hann hjálpaði eldri stelpunni mikið sem varð vitni að þessu. Hann róaði hana og hún er öll að koma til, en hún er enn í svakalegu sjokki yfir þessu."

Og litla telpan er öll að braggast að sögn óskars: „Hún er bara uppi að horfa á skrípó og bulla í læknunum. Hún er búin til úr stáli og ekkert að spá í þessu," segir hann.

Þó stúlkan sé úr lífshættu þá er ljóst að áverkarnir voru alvarlegir.

„Það er 4-6 sm skurður á brjóstinu á henni og þetta hafi verið millimetrar þá hefði farið beint í dæluna, en það slapp. Hún rispaðist eitthvað í lifrinni en hún er öll að koma til. Það voru blæðingar inni í maganum en þeir segja að hún sé safe," segir Óskar.

Í fjölmiðlum í dag var minnst á að Óskar væri stuðningsmaður Hells Angels. Óskar vill sem minnst um það segja og svarar: „Ég vil ekkert tjá mig um það. Ég er í mótorhjólaklúbbi. En það kemur þessi máli ekkert við."