Þóra Björk í tónlist á eigin forsendum

Sólóplatan I Am a Tree Now er frumraun Þóru Bjarkar Þórðar­dóttur. Lögin á plötunni má flokka sem alternatíft popp-rokk þar sem djass, þjóðlagafílingur, kántrí og blágresi svífa yfir vötnum.

„Ég byrjaði níu ára að læra á gítar og var að semja smá rokk sem unglingur,“ segir Þóra. „Ég hafði samt ekki nógu mikla trú á því og fór ekki að semja lög aftur fyrr en árið 2004 þegar ég var búin að vera í námi í FÍH í þrjú ár.“

Þóra útskrifaðist 2007 og var í hljómsveitinni Þel sem spilaði þjóðlagamúsik í anda Fairport Convention. Þel lagði upp laupana í miðri demógerð. „Ég er búin að vera að spila á pöbbum með nýju bandi, bæði mína tónlist og kóverlög og svo er ég að safna fyrir því að halda útgáfutónleika af því ég vil geta borgað fólkinu sem spilar með mér.“

Þóra segir það aldrei hafa freistað sín mikið að fara í Idol-keppnina. „Það var þrýst á mig á tímabili og ég neita því ekki að það var aðeins freistandi að kynna sig, en samt var maður hræddur við Idol-stimpilinn. Ég beit það snemma í mig að gera tónlistina á mínum eigin forsendum og það endaði með því að ég gaf plötuna meira að segja út sjálf.“

Þóra kallar útgáfuna Happy Records og segir að platan verði kynnt í auglýsingaherferð hjá Ariel Hyatt á netinu. Ariel er frá New York og var með „meik-námskeið“ á Íslandi sem Þóra sótti.

Tónlist Þóru er angurvær, tregafull og vongóð. Lag hennar „Sólarylur“ varð í öðru sæti í baráttu- og bjartsýnislagakeppni Rásar 2 í sumar. „Það er pínu epík í þessu, mörg lögin eru lengri en gengur og gerist,“ segir hún. Þóra er með hörku spilara með sér, meðal annars Kjartan Valdemarsson og Birgi Bragason. Hildur Ársælsdóttir og Sólrún Sumarliðadóttir úr Amiinu leika einnig á fiðlu, sög og selló. Og textarnir? „Þetta er trjá-plata um mannlega náttúru,“ segir Þóra hlæjandi og vísar til titilsins, Núna er ég tré.- drg