Skipa aðra Evrópunefnd

Ríkisstjórnin hefur ákveðið að setja á laggirnar nefnd um þróun Evrópumála undir forystu Illuga Gunnarssonar og Ágústs Ólafs Ágústssonar þingmanna. Fram kemur í tilkynningu frá forsætisráðuneytinu að þetta sé gert ísamræmi við stefnuyfirlýsingu ríkisstjórnar Sjálfstæðisflokks og Samfylkingar.

Í nefndinni eiga einnig sæti fulltrúar stjórnmálaflokka sem sæti eiga á Alþingi, einn frá hverjum flokki. Að auki býðst Alþýðusambandi Íslands, Samtökum opinberra starfsmanna, Samtökum atvinnulífsins og Viðskiptaráði Íslands að tilnefna hvert einn fulltrúa í nefndina.

Verkefni nefndarinnar verður að fylgja eftir tillögum Evrópunefndar frá mars 2007 um aukna þátttöku stjórnmálamanna og embættismanna í hagsmunagæslu tengdri Evrópustarfi, að athuga frekar hvernig hagsmunum Íslendinga verði best borgið í framtíðinni gagnvart Evrópusambandinu á grunni niðurstaðna Evrópunefndarinnar og að fylgjast með þróun mála í Evrópu og leggja mat á breytingar út frá hagsmunum Íslendinga.

Nefndin ákveður sjálf hvaða málaflokka hún tekur fyrir en skal eftir því sem tilefni er til, standa fyrir útgáfu, samráðsfundum með hagsmunaaðilum og heimsóknum erlendra sérfræðinga. Nefndin skal starfrækja vefsíðu þar sem starfsáætlun, fundargerðir og ítarefni er birt.

Nefndin á að skila ríkisstjórninni skýrslu árlega en hún starfar á vegum forsætisráðuneytis en utanríkisráðuneytið og sendiráð veita nauðsynlega aðstoð. Reiknað er með að hún starfi til 1. febrúar 2011, eða nánast út kjörtímabilið.