Þrettán ungmenni fengu hvatningarverðlaun forseta

Ólafur Ragnar Grímsson, forseti Íslands, afhenti 13 ungmennum „Hvatningu forseta Íslands til ungra Íslendinga" í heimsókn sinni til Skagafjarðar í dag. Hvatningin var afhend á fjölskylduhátíð í íþróttahúsinu á Sauðárkróki.

Hér fyrir neðan má sjá lista yfir þau ungmenn sem fengu verðlaun og rökstuðning fyrir valinu.



Bjarni Þórir Jóhannsson, 15 ára, Sætúni 9, Hofsósi.

Hann hefur sýnt fádæma dugnað og samviskusemi þrátt fyrir lesblindu.

Bryndís Rut Haraldsdóttir, 13 ára, Brautarholti í Skagafirði.

Hún er dugleg í íþróttum og hefur spilað fótbolta frá því hún var á leikskólaaldri, bæði við stelpur og stráka, góður vinur, kurteis og prúð.

Elín Árdís Björnsdóttir, 16 ára, Kvistholti Skagafirði.

Hún hefur verið burðarás í félagslífi síns skóla, frábær leikkona og námsmaður.

Gísli Felix Ragnarsson, 15 ára, Víðigrund 24 Sauðárkróki.

Þrátt fyrir meðfæddan sjúkdóm hefur hann sýnt einstaka ljúfmennsku og æðruleysi í allri framgöngu, er virkur í leiklistarstarfi og góð fyrirmynd.

Harpa Lind Einarsdóttir, 12 ára, Hvannahlíð 9 Sauðárkróki.

Hún tókst á við erfiðan sjúkdóm með miklu æðruleysi og jákvæðni og hefur reynst góður félagi.

Ingveldur Vilborg Kristmarsdóttir, 15 ára, Sjónarhóli, Sauðárkróki.

Hún er dugleg, jákvæð og samviskusöm þrátt fyrir ýmsa erfiðleika.

Katarína Ingimarsdóttir, 12 ára, Flugumýri, Varmahlíð.

Hún er afburða námsmaður, einnig í tónlist; með ljúfa framkomu og stóð sig mjög vel í Stóru upplestrarkeppninni.

Kolbjörg Katla Hinriksdóttir, 13 ára, Syðstu-Grund, Varmahlíð.

Hún er framúrskarandi frjálsíþróttakona, stendur sig vel í námi, samviskusöm og dugleg.

Linda Björk Valbjörnsdóttir, 16 ára, Ártúni 7 Sauðárkróki.

Hún er afreksmaður í frjálsum íþróttum, margfaldur Íslandsmeistari og góður námsmaður.

Patrycja Sylwia Garlak, 14 ára, Hólavegi 3 Sauðárkróki.

Þrátt fyrir aðeins tveggja ára búsetu á Íslandi hefur hún náð undraverðum árangri í íslensku og verið góð fyrirmynd í öllum samskiptum.

Sigurgeir Ólafsson, 15 ára, Kálfsstöðum í Hjaltadal.

Hann er framúrskarandi nemandi sem sýnir sjálfstæði og ábyrgð, hvort heldur í íþróttum eða bóklegu og hefðbundnu námi.

Stefán Ingi Gestsson, 15 ára, Höskuldsstöðum, Varmahlíð.

Hann er jákvæður og glaður einstaklingur, einstaklega hjálpsamur við samnemendur, kennara og starfsfólk skólans; sýndi á árshátíð skólans að hann er afbragðs leikari.

Tinna Björk Ingvarsdóttir, 11 ára, Laugartúni 10 Sauðárkróki.

Hún hefur sýnt mikla listræna hæfileika, unnið í myndlistarsamkeppnum og spilar á hljóðfæri.