Landsbankinn þrýsti ekki á Reyni

 

Nýi Landsbankinn hefur sent frá sér yfirlýsingu þar sem bankinn sver af sér að hafa haft áhrif á það þegar DV ákvað að birta ekki frétt um Sigurjón Árnason, fyrrverandi bankastjóra.

„Ekki er rétt sem komið hefur fram að Landsbankinn (NBI hf) hafi hlutast til um fréttaflutning DV með þeirri kröfu um að birting fréttar um Sigurjón Þ. Árnason, fyrrverandi bankastjóra gamla Landsbankans, yrði stöðvuð," segir í tilkynningunni.

„Hvorki fyrrverandi stjórnendur né stærstu hluthafar gamla Landsbankans hafa á nokkurn hátt hlutast til um málefni nýja bankans" segir Elín Sigfúsdóttir bankastjóri Landsbankans í tilkynningunni.

Vísir hefur í allan dag reynt að ná tali af Sigurjóni Þ. Árnasyni, án árangurs.