Samningur um meðferðargang á Litla Hrauni

Björn Bjarnason, dóms- og kirkjumálaráðherra, og Guðlaugur Þór Þórðarson, heilbrigðisráðherra, undirrituðu í dag samning sem tryggir fé til að standa undir rekstri við sérstakan meðferðargang í fangelsinu á Litla-Hrauni þar sem fangar sem kjósa svo fá hjálp við að vinna sig út úr vítahring andfélagslegs hugarfars, afbrotahegðunar og vímuefnamisnotkunar.

Í tilkynningu frá dómsmálaráðuneytinu segir að undanfarna mánuði hafi verið starfræktur sérstakur meðferðargangur á Litla-Hrauni þar sem fangar sem dvelji á ganginum fái víðtækan stuðning og einstaklingsmiðaða ráðgjöf með það að markmiði að ná þeim út úr vítahring andfélagslegs hugarfars, afbrotahegðunar og vímuefnamisnotkunar. Fangarnir gangist undir ákveðnar reglur og skuldbindi sig m.a. til að neyta engra vímuefna meðan þeir dvelji á meðferðarganginum. Um sé að ræða tilraunaverkefni sem upphaflega hafi verið hugsað til sex mánaða og að þeim liðnum skyldi reynslan vera metin og tekin ákvörðun um framhaldið.

„Það er skemmst frá því að segja að árangurinn er mjög góður og því hafa dóms- og kirkjumálaráðherra og heilbrigðisráðherra tekið höndum saman til að tryggja áframhaldandi starfsemi meðferðagangsins. Leggur hvort ráðuneytanna fyrir sig fram 7,5 milljónir, alls 15 milljónir, sem dugir fyrir rekstrinum út þetta ár. Að auki verður sett á laggirnar samráðsnefnd ráðuneytanna sem mun vinna að heildarstefnumótun í þessum málum," segir í tilkynningu frá ráðuneytinu.