Hálf milljón í fundarlaun - Enginn gefið sig fram

"Ég hef ekki fengið neinar haldbærar ábendingar," segir Benjamín Þór Þorgrímsson líkamsræktarmaður og einkaþjálfari en hann leitar mannsins sem kveikti í VW Touareq lúxusjeppanum hans fyrir skömmu.

Jeppi Benjamíns stóð á bílastæði fyrir utan heimili hans í Naustabryggju í lok apríl þegar einhver óprúttinn aðili bar að honum eld.

Benjamín býður þeim sem getur gefur upplýsingar sem vísa á sökudólginn hálfa milljón í fundarlaun. "Það hafa margir haft samband með ábendingar eftir að ég tilkynnti að fundarlaun væru í boði. En ég hef enn ekki fundið brennuvarginn," segir Benjamín.

Aðspurður hvort hann sé að íhuga að hækka fundarlaunin svarar Benjamín að það sé ekki á döfinni. Hann sé þess fullviss að sá seki komi í leitirnar.

Myndskeiðið sem fylgir fréttinni sýnir hvernig jeppinn hans Benjamíns brann til kaldra kola.