Vonar að Þór hafi ekki orðið fyrir skemmdum

Gamla varðskipið Þór strandaði undan Hvammsvík skömmu fyrir hádegi. Þór hefur ekki verið í þjónustu Landhelgisgæslunnar síðustu ár en hann er nýttur við kvikmyndatökur við Grundartanga. Leikstjóri myndarinnar segir að skipið hafi verið mannlaust enda hafi tökuliðið fengið frí í gær vegna slæmrar veðurspár. Hann er vongóður um að skipið hafi staðist raunina.

Júlíus Kemp, leikstjóri myndarinnar, segir að í gær hafi verið ákveðið að gefa tökuliðinu frí í ljósi þess að útlit var fyrir vonskuveður. Hann segir að skipið hafi verið við akkeri í víkinni og að svo sé raunar enn. Hins vegar hafi rokið verið svo mikið að skipið hafi dregist að ströndinni þrátt fyrir akkerin.

Hann segist þó vona að skipið hafi ekki skemmst og bendir á að Þór sé traustbyggt skip sem þjónað hafi vel í þorskastríðunum.

Að sögn Júlíusar hafa tökur á myndinni að öðru leyti gengið vel og eru þær á áætlun. Myndin verður frumsýnd í sumar.