Íslendingar missa ekki svefn yfir jarðhlýnun

Íslendingar hafa ekki þungar áhyggjur af því að hlýnun jarðar muni valda þeim búsifjum. A.m.k. ekki ef marka má nýlega könnun Gallup International sem gerð var víða um heim í tilefni af degi jarðarinnar 22. apríl.

Afstaða 60.000 íbúa 57 landa var könnuð og spurt hvort fólk væri sammála eða ósammála fullyrðingunni „Hlýnun jarðar hefur alvarleg áhrif núna á mínu búsetusvæði". Í heildina samþykktu 66% þessa fullyrðingu, 27% voru henni ósammála og 7% voru óákveðnir eða svöruðu ekki.

Þegar litið er á skiptingu svaranna milli heimsálfa voru flestir sammála fullyrðingunni í Asíu en Suður-Ameríka og Vestur-Evrópa fylgdu í kjölfarið. Afríkubúar voru síst sammála.

Fram kemur í pistli Gallup um könnunina að í öllum löndum hafi meirihluti spurðra verið sammála fullyrðingunni nema Íslendingar. Hér voru 59% ósammála en 29% sammála. Gallup telur skýringanna vera að leita í möguleikum Íslands til sjálfbærrar orkunýtingar auk hins hreina vatns og lofts.

Á hinum endanum eru Albanar en 97% þeirra lýstu sig sammála því að hnattræn hlýnun hefði alvarleg áhrif á þeirra búsetusvæði. Í kjölfarið fylgdu Hong Kong- og Rúmenínubúar með 93% og 91% hlutfall samþykkra.