Björn forðast fréttamenn

Björn Bjarnason dómsmálaráðherra segir að miklu skipti fyrir fundarstaði ríkisstjórnarinnar að ráðherrar hafi rými þannig að þeir gangi ekki beint í flasið á fréttamönnum að loknum ríkisstjórnarfundum. Björn gerði fundarstaði ríkisstjórnarinnar að umfjöllunarefni í nýjustu færslu á vefsíðu sinni. Ríkisstjórnin fundaði í morgun í fundarsal forsætisnefndar Alþingis í þinghúsinu.

„Af þeim þremur fundarsölum, sem ríkisstjórnin hefur notað, á meðan ég hef setið í henni, er þessi sá þægilegasti. Einnig skiptir miklu, að rými er fyrir framan hann, þannig að menn ganga ekki beint í flasið á fréttamönnum, sem bíða með myndatökumönnum og sitja fyrir ráðherrum að fundi loknum," segir Björn á vefsíðu sinni.

Ríkisstjórnin fundaði einnig í þinghúsinu síðastliðinn föstudag.