Segir Svan ófrægja Hannes Hólmstein

Björn Bjarnason dómsmálaráðherra tjáir sig um greinar Svans Kristjánssonar prófessors sem birtust í Fréttablaðinu í vikunni á heimasíðu sinni.

Þar fjallar Svanur um störf Hannesar Hólmsteins við Háskólann og segir hann m.a hafa hlotið lektorsstöðu við Háskólann vegna skoðana sinna og hugmynda en ekki fræðilegra eiginleika.

Björn segir Svan hafa ritað greinarnar til þess að ófrægja Hannes og að á bakvið þessi skrif búi óvenjulegur illvilji. Hann segir Svan einnig hafa veist að Ólafi Þ. Harðarssyni prófessor við félagsvísindadeild skólans.

„Ég hef ekki kynnt mér önnur skrif Svans á fræðasviðinu en þau, sem snerta embætti forseta Íslands. Þau ná ekki máli, heldur byggjast á annarlegum sjónarmiðum eins og skrif Svans um Hannes Hólmstein," skrifar Björn á heimasíðu sína.