Hátt í fjórðungi félagsmanna í FÍA verið sagt upp

Flugfélag Íslands sagði upp fjórum flugmönnum um mánaðamótin og hefur þá samtals sagt upp fimmtán flugmönnum á árinu. Með uppsögnunum hjá Icelandair hefur 127 flugmönnum verið sagt upp frá áramótum eða hátt í fjórðungi félagsmanna í Félagi íslenskra atvinnuflugmanna.

Ástæðan fyrir uppsögnum Flugfélags Íslands er minnkandi flutningur í innanlandsflugi sem að verulegu leiti má rekja til þess að álversframkvæmdum í Reyðarfirði er lokið og umsvif framkvæmda við Kárahnjúka eru ekki nema svipur hjá sjón miðað við undanfarin ár.

Um það bil sextíu flugmenn munu starfa hjá Flugfélagi Íslands í vetur, heldur færri en í fyrravetur og horfur eru á að heldur færri flugmenn verði hjá félaginu næsta sumar en voru í sumar. Það er því þungt hljóð í flugmönnum þessa dagana.