Telur líklegt að búið sé að hindra frekara kortasvindl

Haukur Oddsson, forstjóri Borgunar, umboðsaðila Mastercard á Íslandi, segir allt benda til að búið sé að koma í veg fyrir frekari þjófnað úr hraðbönkum. Hundruð þúsundum króna var stolið úr hraðbönkum á höfuðborgarsvæðinu frá síðastliðnum föstudegi til laugardags. Haukur segir að umfang svindlsins nú sé þó ekki eins mikið og það var um páskahelgina þegar milljónir króna voru teknar út á fölsuð kreditkort.

Haukur segir að nauðsynlegt hafi verið að loka fyrir ákveðnar tegundir af erlendum greiðslukortum. Þeir sem eru með slík kort í notkun geti því ekki tekið pening út á þau í hraðbönkum. Þá segir Haukur vel sé fylgst vel með greiðslukortafærslum. Séu margar færslur á sama korti á skömmum tíma vakni upp grunur um svik.

Eftir síðustu páska voru tveir útlendingar, Rúmeni og Þjóðverji, gripnir með peninga í farangri sínum á leið úr landi. Upphæðin var hátt á fjórðu milljón króna og talið er að hún hafi verið svikin úr hraðbönkum. Ekki er vitað hvort málið sem kom upp nú um helgina og málið sem kom upp um páskana tengist.

Vísir hefur ekki náð tali af Höskuldi Ólafssyni, forstjóra Valitors, sem hefur umboð fyrir Vísa.