Hvað hefði Hillary getað gert við peningana?

Hillary Clinton eyddi svimandi háum fjárhæðum í tilraun sinni til að tryggja sér tilnefningu demókrata til forsetaframboðs í Bandaríkjunum. Dagblaðið New York Daily News hefur tekið saman kostnaðinn og gefur henni nokkur dæmi um hvað hún hefði getað gert við peningana annað en að henda þeim á glæ í kosningabaráttu sem tapaðist.

Clinton eyddi 212 milljónum bandaríkjadala, eða um 16 milljörðum íslenskra króna, í baráttunni. Hún uppskar átján milljón atkvæði og skilaði það henni 1.926 kjörmönnum. Það þýðir að Hillary eyddi tæpum 110 þúsund bandaríkjadölum á hvern kjörmann, eða um 8.3 milljónum króna.

Blaðið segir að þetta þýði að Hillary, sem í byrjun baráttunnar var talin nær örugg um sigur eyddi meira en nokkur annar frambjóðandi hefur gert í sögunni án þess að tryggja sér sigur.

Fyrir peningana hefði Hillary meðal annars getað boðið 76 þúsund fjögurra manna fjölskyldum í Disneyland, gefið tæplega tíu þúsund Toyota Prius bifreiðar eða 70,7 milljón sparperur.

Hún hefði einnig getað keypt bóluefni gegn flensu fyrir 10,6 milljónir manna, eða gefið öllum nemendum í gamla háskólanum sínum, Porsche 911 Carrera, en þeir eru 2300.

Að endingu reiknar blaðið út að Clinton hefði getað, í stað þess að eyða peningunum í baráttuna, boðið hverjum einasta íbúa New York ríkis í bíó og mælir blaðamaðurinn með myndinni "The Fall".