Opnar heimili sitt til varnar Ölkelduhálsi

Á morgun eru síðustu forvöð að senda inn athugasemdir við breytingu á aðalskipulagi Sveitarfélagsins Ölfuss vegna Bitruvirkjunar við Ölkelduháls.

Lára Hanna Einarsdóttir, leiðsögumaður og þýðandi, hefur á bloggsíðu sinni vakið athygli á virkjunarframkvæmdum á þessu svæði og því hvernig staðið er að þeim í samkomulagi Ölfuss og Orkuveitu Reykjavíkur. „Samkomulagið er gert löngu áður en lögbundið ferli hófst við umhverfismat og breytingu aðalskipulags sem krafist er við svona miklar framkvæmdir, svo ekki sé minnst á hvað þær eru umdeildar," ritar Lára Hanna.

Milli klukkan 15 og 19 í dag hyggst Lára Hanna hafa opið hús á heimili sínu að Vesturgötu 23 í Reykjavík og bjóða gestum og gangandi að undirrita athugasemdabréf sem hún hefur samið og liggja frammi. Vill Lára Hanna með þessu gera allt sem í hennar valdi stendur til að fyrirbyggja að Ölkelduhálssvæðinu, sem er á náttúruminjaskrá, verði breytt í iðnaðarsvæði.

„Orkuveita Reykjavíkur ætlar að reisa fjölmargar jarðgufuvirkjanir. Þessar virkjanir nýta auðlindina mun verr en jarðvarmavirkjanir. Jarðgufuvirkjun framleiðir eingöngu rafmagn, hún dælir vatninu bara ofan í jörðina aftur," útskýrir Lára Hanna og bætir því við að Ölkelduhálsinn sé slík náttúruperla að hann megi ekki eyðileggja.

Sýnishorn af því fallegasta í íslenskri náttúru

„Þarna er gríðarlega fallegt útsýni, meðal annars yfir Þingvallavatn. Í raun má þarna sjá sýnishorn af öllu því fallegasta í íslenskri náttúru, rétt við túnfót Reykjavíkur. Þessu svæði erum við að reyna að bjarga frá því sem við teljum vera ástæðulausa virkjun," segir Lára Hanna og býður öllum sem áhuga hafa að kynna sér málið á bloggsíðu hennar, larahanna.blog.is, og vefsíðunni hengill.nu.

„Þessar virkjanir koma til með að spúa frá sér brennisteinsvetni og Hveragerði er þarna alveg ofan í. En auk þess berst þetta yfir allt suðvesturhornið. Íbúar í Austurbæ Reykjavíkur eru farnir að finna fyrir þessu frá Hellisheiðarvirkjun. Orkuveitan segist ætla að hreinsa þetta en aðferðirnar sem þeir ætla að nota eru enn á tilraunastigi svo þeir vita ekkert hvað kemur út úr því. Auk þess viðurkenna þeir að þeir hreinsa ekki á framkvæmdatíma. Þetta er nú þessi hreina orka sem allir eru að tala um, fyrir utan hljóð- og sjónmengun," segir Lára Hanna að lokum, ómyrk í máli.