Tekjur lækna ákveðnar með samningum við ríkið

Sjálfstætt starfandi læknum, sem ríkið er með samning við, verður óheimilt að innheimta hærra gjald fyrir læknisþjónustu en það sem samið er um við nýja Sjúkratryggingastofnun, nái nýtt frumvarp um Sjúkratryggingar fram að ganga. Með því er ætlunin að girða fyrir að sjúklingar geti greitt sig fram fyrir röðina.

Frumvarp til laga um sjúkratryggingar sem heilbrigðisráðherra leggur fram fer í fyrstu umræðu á Alþingi eftir helgi og er stefnt að afgreiðslu fyrir þinglok. Árni Páll Árnason þingmaður Samfylkingar og nefndarmaður í heilbrigðisnefnd segir frumvarpið fela í sér töluverðar breytingar.

Ný Sjúkratryggingastofnun tekur til starfa í haust og hennar hlutverk er að semja um og kaupa heilbrigðisþjónustu fyrir hönd heilbrigðisráðuneytisins. Greiðsluþátttakan sjúklinga helst óbreytt en samningar milli lækna og sjúkratryggingastofnunar koma í veg fyrir að læknar geti innheimt hærra verð en samið er um.

Árni Páll segir að varhugavert sé þegar læknar sem ekki eru á samningum við ríkið geti verðlagt læknisþjónustu að vild en sjúkratryggingar greiði einungis hluta þeirra. Sjúklingarnir geti því setið uppi með ákveðinn kostnað sem ekki fáist endurgreiddur eða efnameiri sjúklingar geti greitt sig fram fyrir röðina. Með frumvarpinu er tekið fyrir þetta.