Rekstur björgunarskipa tryggður

Rekstur björgunarskipa Slysavarnarfélagsins Landsbjargar hefur verið tryggður en um tíma leit út fyrir að 45 milljón króna skuld ríkisvaldsins myndi jafnvel leiða til rekstrarstöðvunar skipanna. Félagið fékk 30 milljónir á fjáraukalögum.

Vísir greindi 23. nóvember frá vanda Slysavarnarfélagsins en forsaga málsins er sú að árið 2005 ákvað Alþingi að veita 15 milljónum til félagsins svo hægt væri að fjölga björgunarskipum. Sama ár var gerður nýr samningur á milli ríkisins og félagsins um rekstur skipanna og hækkaði fjárframlagið um 15 milljónir. Hækkun skilaði sér aldrei.

Slysavarnarfélagið fékk 30 milljónir á fjáraukalögum sem samþykkt voru fyrir jól, að sögn Kristins Ólafssonar framkvæmdastjóra félagsins. Eftir standa rúmar 15 milljónir og hefur Kristinn fulla trú að samkomulag náist við dómsmálaráðuneytið um þá upphæð.

,,Við erum afskaplega þakklát þingmönnum fyrir að sýna okkur skilning á þessum erfiðu tímum. Það er náttúrulega verið að skera mikið niður en þetta verður til þess að við munum ná að halda úti rekstri björgunarskipanna," segir Kristinn.