Sex milljónir komnar í söfnun RKÍ vegna hamfara í Búrma

Rauði krossinn hefur þegar safnað sex milljónum króna til hjálparstarfs í Búrma.

Í tilkynningu frá Rauða krossinum segir að pokasjóður verslunarinnar hafi afhent hjálparsamtökunum fimm milljónir króna til hjálparstarfsins og þá hefur safnast um ein milljón frá almenningi með framlögum. Þeirra fjármuna er aflað í söfnunarsíma Rauða krossins 907 2020 og á bankareikninginn 1151- 26- 12. Áður hafði verið greint frá því að Rauði kross Íslands hefði veitt fimm milljónir úr hjálparsjóði sínum í neyðarbeiðni Alþjóða Rauða krossins.

Rauði krossinn segir að fyrstu hjálpargögn Alþjóða Rauða krossins hafi nú borist til Mjanmar og er vonast til að næstu sendingar muni berast á morgun og næstu daga. Um 27.000 sjálfboðaliðar og Rauða krossins hafa unnið sleitulaust við að dreifa brýnustu nauðsynjum til nauðstaddra síðan fellibylurinn Nargis reið yfir landið fyrir viku.

Þeim sem vilja styðja fórnarlömb fellibyljarins er bent á vefsíðuna raudikrossinn.is, reikning hjálparsjóðs Rauða krossins í banka 1151, hb. 26, reikning 12, kt. 530269-2649, og söfnunarsímann 907 2020. Við hvert símtal dragast 1.200 kr. frá næsta símreikningi.