Ljósmæður kjósa um verkfallsaðgerðir

,,Félagsfundurinn samþykkti að boða til almennrar atkvæðagreiðslu meðal félagsmanna um verkfallsboðanir," segir Guðlaug Einarsdóttir, formaður Ljósmæðrafélag Íslands. Félagsfundur félagsins samþykkti einróma í kvöld að efna til rafrænnar kosningar í næstu viku um verkfallsboðanir. Niðurstaða mun liggja fyrir í hádegi 15. ágúst.

Samningafundur í deilu ljósmæðra og ríkisins í morgun var stuttur og árangurslaus. Ljósmæður vilja fá menntun sína metna til jafns við stéttir með sambærilegan bakgrunn.

,,Þetta er neyðarúrræði sem við grípum þar sem samningaviðræður við ríkið hafa ekkert gengið. Við neyðumst til að sína viðsemjendum okkar hvað það þýðir að hafa ekki ljósmæður að störfum," segir Guðlaug.

Stjórnin félagsins lagði fyrir félagsfundinn tillögu um fimm sjálfstæð verkföll sem hefjast með tveggja sólarhringa vinnustöðvun dagana 4. og 5. september næst komandi. Ef félagsmenn samþykkja áform um verkfallsaðgerðir munu stigmagnandi verkföll eiga sér stað í septembermánuði og allsherjarverkfall ljósmæðra hefjast 29. september.