Viðræður í hnút og aðgerðar ræddar hjá ljósmæðrum

Kjaraviðræður Ljósmæðrafélags Íslands og samninganefndar ríkisins eru í algjörum hnút og félagsfundur Ljósmæðrafélagsins tekur í kvöld afstöðu til hugmynda forystumanna félagsins um aðgerðir til að knýja á um launaleiðréttingu.

Samningafundur var í deilu ljósmæðra og ríkisins í morgun en hann var stuttur og árangurslaus að sögn Guðlaugar Einarsdóttur, formanns Ljósmæðrafélags Íslands. Aðspurð um það á hverju strandi segir Guðlaug: „Það strandar á því að leiðrétta okkur í launatöflu ríkisins. Við höfum vilja ganga til samninga við ríkið á svipuðum nótum og BHM en við erum á kolröngum stað í töflunni miðað við önnur félög," segir Guðlaug. Ljósmæður vilji fá menntun sína metna til jafns við stéttir með sambærilegan bakgrunn.

Aðspurð um framhaldið segir Guðlaug að Ljósmæðrafélagið haldi fund í kvöld þar sem ræða á hugsanlegar aðgerðir til þess að knýja á um launaleiðréttingu. „Við heyrum í félagsmönnum í kvöld og höldum svo blaðamannafund í kjölfarið þar sem niðurstaða fundarins verður kynnt," Guðlaug vill ekki tilgreina í hverju aðgerðirnar muni felast, hugmyndirnar verði fyrst kynntar fyrir félagsmönnum.

Fram kom í fréttum í júlí að um hundrað ljósmæður hefðu sagt upp störfum til að knýja á um betri kjör og aðspurð segir Guðlaug að hún viti ekki betur en að þær standi. Uppsagnirnar taka gildi 1. október „og við róum lífróður til þess að reyna að afstýra því," segir Guðlaug.